Mərkəzi Gömrük Hospitalı və Avstriya Respublikasının EVER Pharma şirkəti arasında imzalanmış müqaviləyə əsasən kəskin işemik insultdan sonra orta və ya ciddi nevroloji defisitlərdən əziyyət çəkən pasiyentlərin müalicəsinin səmərəliliyi və təhlükəsizliyi ilə bağlı klinik təcrübələri qiymətləndirmək üçün reyestr tədqiqatı aparılmışdır. İnsultun müalicəsini mümkün qədər effektiv etmək məqsədilə keçirilən bu çoxmərkəzli beynəlxalq tədqiqata Mərkəzi Gömrük Hospitalı tərəfindən kəskin işemik insultdan əziyyət çəkən və NIHSS şkalasına görə 8-15 aralığında olan 20 pasiyent daxil edilmişdir.  

Mərkəzi Gömrük Hospitalı tərəfindən tədqiqatın aparılmasını, pasiyentlərin müayinə və müalicəsini, eCRF reyestrinə daxil edilməsini, sonraki 3 aylıq nəzarəti və dinamikanın izlənməsini  baş tədqiqatçı, həkim reanimatoloq-anestezioloq Dr. Mehdi Əliyev gerçəkləşdirmişdir. 

Tədqiqatın nəticələri və elmi hesabat EVER Pharma şirkətinin xüsusi komitəsi tərəfindən dərc olunacaq və tənzimləyici qurumlara təqdim ediləcəkdir. Mərkəzi Gömrük Hospitalı beynəlxalq reyestrdə iştirak etmiş tibb mərkəzlərinin siyahısına daxil ediləcəkdir.