Mərkəzi Gömrük Hospitalının pediatrı Nigar Mirzəyeva AzTV Mədəniyyət TV-nin “Səhər” proqramına canlı yayımda “Uşaqların qidalanmasında nələrə diqqət etməliyik?” mövzusunda müsahibə verib. Süjeti Sizə təqdim edirik. https://youtu.be/oUSrZUcLCRI
Azyaşlıların məktəb yaşı dövründə qidalanmasına xüsusi diqqət etmək lazımdır. Qidalanma zamanı kiçik nizamsızlıq uşaqların diqqətsizliyinə, qavrama problemlərin yaranmasına gətirib çıxarır. Bundan əlavə, dişlərin çürüməsi, dəmir çatışmazlığı, immunitetin zəifləməsi yanlış qidalanma zamanı yaranan sağlamlıq problemləridir.
Düzgün olmayan qidalanma alışqanlıqları ən çox məktəb çatmış uşaqlarda aşkar olunur. Uşaqların məktəbdə uğur qazanması üçün qidalanma rasionuna diqqət yetirmək vacibdir.
Məktəb yaşına çatmış uşaqlar gün ərzində ən azı 4 dəfə qidalanmalıdır. Uşaqların qida menyularında süd məhsulları, karbohidratlar, vitamin, ət və yumurta yetərincə yer almalıdır.
Eyni zamanda səhər yeməyində nələrin yeyilməsi də bir o qədər önəmlidir. Səhər yeməyini qəbul etməmək, kifayət qədər tərəvəz və meyvə qəbul etməmək, fast-food və qazlı içkilər qəbul etmək, uşaqlarda köklük və anoreksiya xəstəliklərinin yaranmasına səbəb olur.
İmmunitet sistemini gücləndirən, vitamin və minerallarla zəngin tərəvəz və meyvə; gündəlik enerji ehtiyacının çox hissəsini təmin edən çörək və çörək məmulatları masada olmalıdır.
Uşağın normal inkişafı üçün onun menyusunda tərkibi dəmir və C vitamini ilə zəngin olan ət, balıq, toyuq, yumurta, paxlalı bitkilər, yaşıl tərəvəzlər və bəhməzin olması önəmlidir. Məktəblilərin qidalanması ilə bağlı ən vacib amillərdən birincisi su və maye qəbuludur. Ən faydalı maye yeni sıxılmış meyvə şirəsi, süd, həmçinin təbii ərzaqlardan çəkilmiş təmiz, qatqısız şirələrdir.