“Muğanbank” ASC və Avropa Yenidənqurma və İnkişaf Bankı (AYİB) arasında birgə əməkdaşlıq çərçivəsində həyata keçirilən transformasiya layihəsi uğurla tamamlanmışdır.
2020-ci ilin ikinci yarısından etibarən “Azərbaycanda Maliyyə Vasitəçilərinin Potensialının Yaradılması Texniki Əməkdaşlıq Proqramı” çərçivəsində “Muğanbank” ASC və AYİB arasında imzalanmış müqaviləyə əsasən həyata keçirilən üçfazalı transformasiya layihəsi xarici konsultant komandaların – TA Consult Partners və Business & Finance Consulting (BFC) – dəstəyilə uğurla icra olunmuşdur.
Layihə çərçivəsində Muğanbankda strategiya, risklərin idarə olunması, problemli kreditlərin həlli, komplayns və informasiya texnologiyaları, həmçinin mikro, kiçik və orta müəssisələrin kreditləşdirilməsi sahəsinin təkmilləşdirilməsi və qabaqcıl beynəlxalq praktikaya uyğunlaşdırılması istiqamətində mərhələli şəkildə işlər görülmüş və qarşıya qoyulan hədəflərə nail olunmuşdur.
Bundan əlavə “Muğanbank” ASC postlayihə dövründə filial şəbəkəsinin optimallaşdırılması, 2021-2023-cü illər üçün strateji planına əsasən yeni xidmət modelinə keçidin təmini və rəqəmsallaşma istiqamətində dəyişiklikləri davam etdirəcək.
Adıçəkilən layihə Avropa Birliyinin EU4Business Initiative fondu, Türkiyənin Xəzinə və Maliyyə Nazirliyinin dəstəyilə həyata keçirilmişdir.
Xarici maliyyə qurumları ilə əməkdaşlığa xüsusi önəm verən Muğanbank bundan sonra da potensial biznes layihələri üzrə həm Avropa Yenidənqurma və İnkişaf Bankı, həm də digər maliyyə qurumları ilə əməkdaşlığı davam etdirəcəkdir.
Azərbaycan maliyyə-bank sektorunun tanınmış qurumlarından biri olan “Muğanbank” ASC 1992-ci ildə fəaliyyətə başlamışdır. Hal-hazırda Bankın ölkə ərazisində 23 filialı və 10 şöbəsi, həmçinin Moskva şəhərindəki nümayəndəliyi hər növ bank məhsulları üzrə keyfiyyətli xidmət göstərir. “Muğanbank” ASC ABŞ Beynəlxalq İnkişaf Agentliyi (USAID), ICBC Bank – Industrial and Commercial Bank of China təşəbbüsü ilə yaradılan “Belt and Road Bankers Roundtable Mechanism” (BRBR – “Bir Kəmər-Bir Yol” Banklarının Dəyirmi Masası), Avropa Yenidənqurma və İnkişaf Bankı (EBRD), Beynəlxalq Maliyyə Korporasiyası (IFC), ABŞ-ın WorldBusiness Capital (WBC) investisiya fondu, Xarici Özəl İnvestisiyalar Korporasiyası (OPIC), Özəl Sektorun İnkişafı üzrə İslam Korporasiyası (ICD), İnkişaf üçün Yaşıl Fond (GGF), Cənub-Şərqi Avropa üzrə Avropa Fondu (EFSE), Almaniya Əmanət Banklarının Beynəlxalq Əməkdaşlıq Fondu (SBFIC) kimi beynəlxalq iqtisadi qurumlarla əməkdaşlıq edir. Muğanbankın xidmət və məhsulları haqqında ətraflı məlumat almaq üçün 933 Məlumat Mərkəzinə zəng edə və ya www.muganbank.az saytına keçid ala bilərsiniz.
