Azərbaycan Dövlət Neft Fondu (ARDNF) Moskvanın «Tverskaya,16» ASC-nin səhmlərinin 100%-nin alınması ilə bağlı əqd bağlayıb.

«APA-Economics»in məlumatına görə, əqdin dəyəri 133 mln. ABŞ dolları təşkil edib.

ASC-nin yeganə aktivi Moskvanın Tverskaya küçəsi,16 ünvanında yerləşən «Aktyor» qalereyasıdır. «Tverskaya,16» ASC-nin nizamnamə kapitalı 159,8 mln. rubl (4 mln. manat) təşkil edir.

Qeyd edək ki, 1882-ci ildə tikilən və 1995-ci ildə bərpa olunan bu binada ticarət-işgüzar mərkəzi yerləşir. Mərkəzin ümumi sahəsi 18 min kv. metr təşkil edir, ondan 5,8 min kv. metr ticarət sahəsidir, 12,2 min kv. metrdə isə ofislər yerləşir.

ARDNF-in yeni strategiyasına uyğun olaraq, onun vəsaitlərinin müəyyən hissəsi xaricdə daşınmaz əmlaka yönəldiləcək. Fond artıq London və Parisdə kommersiya daşınmaz əmlakı alıb.

Xatırladaq ki, Moskvada daşınmaz əmlakının alınması ilə bağlı tərəflər arasında aparılan danışıqlar hələ oktyabr ayında başa çatıb və noyabrda əqdin bağlanması üçün ilkin razılığın alınması məqsədi ilə Rusiya Federal Antiinhisar Xidmətinə müraciət edilib.

www.apa.az