Bakı, FinanceTime. Oktyabrın 24-də BMqT-nin Cənub-Şərqi Avropa və Mərkəzi Asiya ölkələri üzrə Vyanadakı regional ofisinin direktoru Szabados Argentina, təşkilatın Azərbaycandakı Nümayəndəliyinin rəhbəri Vladimir Qyorqiyev BMT Günü münasibətilə BMT-nin Azərbaycandakı nümayəndəliyi tərəfindən ADA universitetində təşkil edilən tədbirdə iştirak etdilər. 

BMT-nin Baş Assambleyasının prezidenti Ticcani Muhammad-Mande, Azərbaycan Respublikasının xarici işlər nazirinin müavini Hafiz Paşayev və BMT-nin Azərbaycandakı rezident əlaqələndiricisi Qulam İshaqzai tədbirin açılış hissəsində çıxış etdilər. 

Hökumət, diplomatik missiyalar, vətəndaş cəmiyyəti, akademik dairələr və kütləvi informasiya vasitələrini təmsil edən 250-ə yaxın iştirakçının qatıldığı bu tədbirdə BMT ilə əməkdaşlıqdan bəhrələnmiş şəxslərin dəyişən həyatlarına həsr olunmuş təqdimatlar edildi. 

Tədbirdə çıxış edən natiqlərdən biri Xaçmazda dərzilik fəaliyyəti ilə məşğul olan Aynur Ağabalayeva idi. O, təqdimatında dərzi işini qurmaq üçün Beynəlxalq Miqrasiya Təşkilatının Azərbaycan nümayəndəliyi tərəfindən ABŞ-ın Beynəlxalq İnkişaf Agentliyinin maliyyə dəstəyi ilə həyata keçirilən "Həssas İcmaların Dayanıqlığının Gücləndirilməsi" layihəsi çərçivəsində ona necə köməklik edildiyini və bu dəstəyin onun həyatını tamamilə dəyişdirdiyini qeyd etdi. "Həssas İcmaların Dayanıqlılığının Gücləndirilməsi" layihəsinin əsas istiqamətlərindən biri həssaslığı ilə seçilən əhali qruplarının sosial-iqtisadi rifahının artırılmasıdır. 

24 oktyabr 1948-ci ildən etibarən BMT Günü kimi qeyd olunur. Bu gün BMT-nin nizamnaməsi qüvvəyə minib.