Bakı, FinanceTime.  “AtaSığorta” ASC 2019-cu ilin 9 ayı üzrə maliyyə nəticələrini açıqlamışdır. Şirkətdən verilən məlumata əsasən cari ilin yanvar-sentyabr ayları ərzində şirkətin ümumi sığorta haqqı yığımları 13,7 milyon manatdan çox olmuşdur. Keçən ilin müvafiq dövrü ilə müqayisədə ümumi sığorta yığımları 2,6 milyon manat (15,8%) azalmışdır.
Avtonəqliyyat vasitəsi sahiblərinin mülki məsuliyyətinin icbari sığortası sinifi üzrə azalmanın 3,8 milyon manat olmasını nəzərə alsaq, digər sığorta sinifləri üzrə 1,2 milyon manata yaxın artım müşahidə edilməkdədir.
“AtaSığorta” ASC 2019-cu ilin 9 ayı ərzində 11,2 milyon manata yaxın sığorta ödənişi həyata keçirmişdir. Keçən ilin müvafiq dövrü ilə müqayisədə sığorta ödənişlərində artım 4,3 milyon manat (63,5%) olmuşdur. Hesabat dövründə şirkətin balans mənfəəti 750 min manatdan çox olmuşdur.