Bakı, FinanceTime.  Azərbaycanda Amerika Ticarət Palatası (AmCham) öz üzvləri üçün Azərbaycan Respublikasının Biznes Mühiti və Beynəlxalq Reytinqlər üzrə Komissiyasının Katibliyinin rəhbəri cənab Vüsal Şıxəliyevin iştirakı ilə “Biznes mühitinin yaxşılaşdırılmasında rəqəmsal yanaşma” mövzusunda tədbir təşkil edib. Diplomatik korpusun nümayəndələri də daxil olmaqla, tədbirdə AmCham-ın təxminən 100 üzvü və tərəfdaşı iştirak edib.

 İlk öncə AmCham-ın İcraçı direktoru xanım Natəvan Məmmədova tədbirin açılış nitqini söyləyərək qonaqları salamlayıb və keçirilən tədbirin əhəmiyyəti barədə danışıb. Daha sonra söz alan AmCham-ın prezidenti cənab Nuran Kərimov qeyd edib ki, tədbirin keçirilməsində əsas məqsəd xarici investorları təmsil edən AmCham vasitəsilə xarici investisiyalı şirkətlərin Azərbaycanda biznes mühitinin daha da yaxşılaşdırılması prosesinə yaxından cəlb etmək və onların fəaliyyəti üçün yaradılan əlverişli imkanlar barədə məlumatları çatdırmaqdır. Ardınca N.Kərimov tədbirin xüsusi qonağı cənab Vüsal Şıxəliyevi iştirakçılara təqdim edərək onu tribunaya dəvət etmişdir. 

Cənab Şıxəliyev ilk olaraq, biznes sektoru nümayəndələri ilə birbaşa görüş imkanına görə öz minnətdarlığını ifadə edərək, dəvət üçün AmCham-ın rəhbərliyinə və üzvlərinə öz təşəkkürünü bildirib. O, daha sonra biznes mühitinin yaxşılaşdırılmasında rəqəmsal yanaşmanın tətbiqi sahəsində görülən işlər və qarşıya qoyulan hədəflər barədə ətraflı çıxış edib. O vurğulayıb ki, biznes mühiti sahəsində yaranan praktiki məsələlərin vahid Platforma (Dövlət-Biznes Dialoqu) çərçivəsində həm dövlət qurumları, həm özəl sektor nümayəndələri, həm də biznes assosiasiyalarının iştirakı ilə müzakirə olunması və  bu sahədə həll yollarının birgə işlənilməsi hazırkı mərhələdə çox mühüm əhəmiyyət kəsb edir. Vüsal Şıxəliyev bildirib ki, qeyd olunan Platforma üzrə hazırlanan təkmilləşmə layihələri və təkliflər  gələcəkdə uğurla tətbiq olunmaqla yanaşı, bütün tərəflərin maraqlarının nəzərə alınmasına imkan verir.