Bakı, FinanceTime. Beynəlxalq Miqrasiya Təşkilatının Azərbaycan nümayəndəliyi tərəfindən USAID/Azerbaijan maliyyə dəstəyi ilə icra olunan “Dayanıqlıq naminə ictimai fəaliyyət” layihəsi çərçivəsində region gənclərinin peşə bacarıqlarının artırılmasına dair fəaliyyəti davam edir. İyun ayından etibarən Quba, Zaqatala və Lənkəran şəhərlərində ümumilikdə seçilmiş 106 gənc üçün peşə bacarıqları təlimi təşkil edilir. Sentyabr ayına qədər davam edəcək təlimlərdə gənclər seçdikləri modul üzrə təlimlərə cəlb olunurlar. Modul-1 peşəkar mühasibatlıq və vergi mütəxəssisi hazırlama proqramı, Modul-2 isə, ECDL təlimi (European Computer Driving Licence – Avropa Kompüter Bilikləri Səviyyə Sertifikatı) üzrə keçirilir. Bununla yanaşı, hər iki modul üzrə proqrama ingilis dili, eləcə də CV yazma, işə müraciət, müsahibə bacarıqları üzrə təlim kursu və proqram bilgilərinin tədrisi də daxil edilmişdir.
USAID və BMqT layihə çərçivəsində region gənclərinin əmək bazarına çıxış imkanlarını artırmaq üçün özəl sektorla əməkdaşlıq qurmaqda maraqlıdır. Bu məqsədlə 17 avqust tarixində Azərbaycanın aparıcı İT şirkətlərindən olan Prosol şirkətinin nümayəndələri - Araz Bayramov və Ramil Məmmədli Lənkəranda peşə bacarıqları təliminin 36 iştirakçısı üçün motivasiya sessiyası keçirdilər.
Mütəxəssislər 'Necə İT mütəxəssisi olmaq olar' adlı bir sessiya zamanı həm qarşıya çıxan çətinliklər barədə məlumat verdilər, həm də onları aradan qaldırmaq üçün məsləhətlərlə paylaşdılar. Sonda mütəxəssilər iştirakçıların suallarını cavablandırdılar.