Bakı, FinanceTime. 12 iyul tarixində Beynəlxalq Miqrasiya Təşkilatının Azərbaycandakı nümayəndəliyinin rəhbəri Vladimir Qyorqiyev və Azərbaycan Dövlət Aqrar Universitetinin (ADAU) rektoru İbrahim Cəfərov Koreya Beynəlxalq Əməkdaşlıq Agentliyinin (KOICA) maliyyə dəstəyi ilə həyata keçirilən “Azərbaycanda kəhriz su sistemlərinin bərpası vasitəsilə məcburi köçkünlərin məskunlaşdığı ərazilərdə kənd yerlərinin kompleks inkişafı” layihəsi çərçivəsində Kahriz Tədqiqat və İnformasiya Mərkəzinin yaradılması və Kəhriz mühəndisliyi kurslarının tədrisinə dair Tərəfdaşlıq Sazişini imzaladılar.
Kəhriz Tədqiqat və İnformasiya Mərkəzi kəhriz sistemləri haqqında məlumatların toplanması, tədqiqatların aparılması, kəhrizlər haqqında məlumatların, bilik və təcrübələrin paylaşılması üçün unikal ixtisaslaşmış Mərkəz olacaq. Bu tərəfdaşlıq çərçivəsində ADAU-nun müəllimləri kəhriz mühəndisliyi üzrə təlimçi kurslarında iştirak edəcək və BMqT ilə birgə tədris planını hazırlayacaqlar. Bu tədris planı müvafiq mütəxəsisslərin hazırlanmasında istifadə ediləcək.
İmzalama mərasimindən sonra BMqT-nin Azərbaycan üzrə nümayəndəliyinin rəhbəri Vladimir Qjorqjiyev bu əməkdaşlıqdan məmnun olduğunu bildirdi: “Biz hazırda Azərbaycanın seçilmiş regionlarda 40 kəhrizin bərpasını nəzərdə tutan bir layihəni həyata keçiririk. Bununla yanaşı, biz kəhriz sistemləri və onun bərpası üzrə biliklərin, təcrübənin və bu işlə məşğul olan kankan peşəsinin gələcək nəsillərə ötürülməsinə çalışırıq. Bu məqsədlə Azərbaycan Dövlət Aqrar Universiteti ilə əməkdaşlıq edəcəyimiz üçün məmnunam”.
ADAU rektoru İbrahim Cəfərov da öz növbəsində bu layihənin icrası üçün kifayət qədər potensiala malik olduqlarını vurğuladı: “ADAU-nun Kəhriz Tədqiqat və İnformasiya Mərkəzinin yaradılması və Kəhriz Mühəndisliyi kursunun hazırlanması üçün yetərli insan resursları və fiziki imkanları vardır və ona görə də inanıram ki, kəhriz mühəndisliyi təcrübəsinin növbəti nəsillərə ötürülməsi və bu işin davamlılığının təmin olunması üzrə bu layihəni uğurla icra edəcəyik”.
BMqT-inin Koreyanın Beynəlxalq Əməkdaşlıq üzrə Agentliyinin (KOICA) maliyyə dəstəyi ilə həyata keçirdiyi “Azərbaycanda kəhriz su sistemlərinin bərpası vasitəsilə məcburi köçkünlərin məskunlaşdığı ərazilərdə kənd yerlərinin kompleks inkişafı” layihəsi çərçivəsində məcburi
köçkünlərində sıx məskunlaşdığı Ağdam, Ağcabədi, Bərdə, Fuzuli, Gəncə, Qazax, Goranboy və Göygöl rayonlarının ərazisində 40-a yaxın kəhrizin bərpası nəzərdə tutulur.