Bakı, FinanceTime. 3 iyul 2019-cu il tarixində Beynəlxalq Miqrasiya Təşkilatının Azərbaycandakı nümayəndəliyinin rəhbəri Vladimir Qyorqiyev və nümayəndəliyin proqram meneceri Mariya Nikolovska Əmək və Əhalinin Sosial Müdafiə Nazirliyi yanında İnsan Alveri Qurbanlara Yardım Mərkəzinin direktoru Həbibə Qəribova ilə görüşmüşdür.
Vladimir Qyorqiyev Mərkəzin mövcud və potensial insan alveri qurbanları arasında dayanıqlığın və məlumatlılığın artırılması istiqamətində BMqT ilə məhsuldar əməkdaşlığa görə öz minnətdarlığını bildirdi. Qyoqiyev ehtiyacı olan şəxlərin faydalanmaları üçün gələcək əməkdaşlığın vacibliyini vurğuladı.
Həbibə Qəribova Mərkəzin imkanları və fəaliyyəti barədə qonaqlara məlumat verdi. Mərkəz artıq 14 ildir fəaliyyət göstərir və insan alveri, həmçinin məişət zorakılığına məruz qalan qurbanlara dəstək göstərir. "Mərkəzdə qurbanlara tibbi, psixoloji, hüquqi, təhsil, təlim və məşğulluqla bağlı geniş xidmətlər təklif olunur" deyə Qəribova bildirib.
Qəribova Zabrat qəsəbəsində tikilən yeni inzibati binanın Mərkəzin fəaliyyətini genişləndirməyə imkan verəcəyini qeyd etdi. Mərkəz yeni binada artıq 2020-ci ildən etibarən fəaliyyət göstərəcək.
Mariya Nikolovska öz növbəsində bildirdi ki, Mərkəzin Azərbaycanın regionlarında dayanıqlığın və məlumatlılığın artırılması istiqamətində gördüyü işlər insan alverinə qarşı mübarizə və insan alveri qurbanlarına yardım sahələrindəki ümumi məqsədlərə çatmaq üçün vacib əhəmiyyət kəsb edir.
Görüş zamanı tərəflər müntəzəm görüşlər və gələcək əməkdaşlığı davam etdirmək barədə razılığa gəldilər.