Baki, Finance Time. 23 iyun 2016-ci il tarixdə Gəncə şəhərində Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) təşkilatçılığı ilə “Aqrar sahədə yeni yanaşmalar vasitəsilə effektivliyin artırılmasına yardım” mövzusunda fermerlər üçün təlim keçirilib. Təlimdə maliyyə savadlılığı, biznes planın təşkili, kənd təsərrüfatında sığortalanmanın faydalılığı və digər mövzularda sahibkarlara geniş və müfəssəl məlumat verilib.Tədbirdə Azərbaycan Sahibkarlar Konfederasiyasının nümayəndələri və 55-dən çox fermer iştirak ediblər.
Azərbaycan Sahibkarlar Konfederasiyasının Gəncə şəhəri üzrə nümayəndəsi Afina Babayeva və ASK-nın Baş hüquqşünası Xəqan Hümmətzadə çıxış edərək Azərbaycan Sahibkarlar Konfederasiyası və həyata keçirdikləri layihələr haqqında ətraflı məlumat veriblər. Bildirilib ki, Azərbaycan Respublikası Sahibkarlar (İşəgötürənlər) Təşkilatları Milli Konfederasiyası davamlı olaraq öz məqsədləri istiqamətində bir sıra layihələr həyata keçirir. Belə layihələrdən biri də “Aqrar sahədə sahibkarlıq fəaliyyəti ilə məşğul olan şəxslərə maliyyə, sığorta, İKT və kooperativlər mövzusunda təlimlərin keçirilməsi” layihəsidir ki, bu layihə çərçivəsində ilk tədbirimizi Gəncə şəhərində təşkil edirik. Qeyd olunub ki, layihə Azərbaycan Respublikası Prezidenti yanında Qeyri-Hökumət Təşkilatlarına Dövlət Dəstəyi Şurası tərəfindən maliyyələşir və cari il ərzində bir neçə bu istiqamətdə tədbirlərin keçirilməsi nəzərdə tutulub. Layihənin əsas məqsədi kənd təsərrüfatı sahəsində fəaliyyət göstərən sahibkarları maliyyə, sığorta, İKT, qida təhlükəsizliyində keyfiyyət standartları və kooperativlər və s. sahələrdə təlimlərə cəlb etməklə onların arasında maarifləndirmə işlərini gücləndirməkdir. Layihədə 4 əsas komponent üzrə ayrı-ayrılıqda mövcud durum araşdırılmış və hazırkı vəziyyət nəzərə alınaraq sahələr üzrə müvafiq məqsəd və vəzifələr müəyyən edilmişdir.
AMFA-nın İdarə Heyətinin Sədri, ekspert Süleyman Kələşov Azərbaycanda Kənd təsərrüfatının mövcud vəziyyəti, sahənin gələcək inkişaf perspektivləri , fermerlərin mövcud maliyyə mənbələri və onlara çıxışın prosedur məsələləri barədə məlumatlandırılması, fermerlərin maliyyə savadlılığının artırılması, kənd təsərrüfatına, eləcə də fermerlərə və sahibkarlara Dövlət dəstəyinin genişləndirilməsi, biznes planın hazırlanması, onun icrası, pul vəsaitlərindən düzgün istifadə edilməsinin təşkili barədə fermerlərin maarifləndirilməsi, bu sahədə uğurlu təcrübənin təşviqi, habelə kənd təsərrüfatında yaranan risklər və onların ölçülməsi, kənd təsərrüfatı məhsullarının sığortalanması məsələlərinin, həmçinin sahibkarların mövzu ilə əlaqədar fikirlərinin, təklif və tövsiyyələrinin öyrənilməsi ilə bağlı çıxış etmişdir.
Qeyd edək ki, tədbir iki gün davam edib.
Tədbirin ikinci günü Gəncə Aqro Biznes Assosiasiyasının əməkdaşı Yalçın Nəsibov kənd təsərrüfatı kooperasiyalarının yaradılması, aqrar sahədə ixracın təşkili mövzularında təqdimatla çıxış edib.
Tədbirdə maraqlı müzakirələr aparılıb və iştirakçıları maraqlandıran suallar ekspertlər tərəfindən cavablandırılıb.