Baki, Finance Time. 26 may 2016-cı il tarixində Astarada Mədəniyyətşünaslıq üzrə Elmi-Metodiki Mərkəzin təsdiq olunmuş İş planına uyğun olaraq İKT-nin regionlarda inkişafı ilə bağlı növbəti səyyar seminar keçirildi.
Tədbirdə Astara Mədəniyyət və Turizm şöbəsinin müdiri Şadoğlan Bayramov Metodiki Mərkəzin rəhbərliyinin Astara rayonunda səyyar seminarın keçirilməsi təşəbbüsünü yüksək qiymətləndirmiş və rayonda mövcud olan mədəniyyət müəssisələri haqqında ümumi məlumat verərək kompüter təchizatı və onların tətbiqi səviyyəsi haqqında ilkin bilgilər vermişdir.
Mədəniyyətşünaslıq üzrə Elmi-Metodiki Mərkəzin İnnovasiyalar və yeni texnologiyaların tətbiqi şöbəsinin əməkdaşı baş metodist Toğrul Hidayətzadə Mərkəzin rəsmi veb-saytını təqdim edərək, fəaliyyət göstərən şöbələri, sosial şəbəkələrdəki rəsmi səhifələri, 2016-cı il üçün müəyyən edilmiş prioritet hədəfləri və keçirdiyi görüşlər haqqında ümumi məlumat vermişdir. Bununla yanaşı, T.Hidayətzadə müəllifi olduğu “Mədəniyyət müəssisələrində İKT-nin tətbiqi üzrə ilkin biliklər” adlı metodiki vəsaitin təqdimatını keçirdi.
Şöbənin metodisti Pərvanə Hüseynova müəllifi olduğu “Mədəniyyət müəssisələrində ictimaiyyətlə əlaqələr işinin təşkili üzrə ilkin biliklər” adlı metodiki tövsiyəsinin təqdimatını edərək, ictimaiyyətlə əlaqələr, müsbət imicin formalaşdırılması üsulları və bu səpkidə digər məsələlərə toxundu.
Seminar zamanı iştirakçıların İKT və PR sahəsində sualları cavablandırılmış və bu sahələrdə tövsiyyələr verilmişdir.